Farmaajo oo qoraal uu soosaaray uga digay MD Xasan Sheekh xasillooni daro & hubanti la’aan
20 Okt 2023 (Puntlandes.com) Madaxweynihii hore JF Soomaaliya Maxamed Cabdulaahi Farmaajo ayaa qoraal uu soo saaray waxaa uu uga digay madaxweyanahe xasan Sheekh inuu dalka ka abuuro xasillooni daro iyo hubanti la’aan.
Farmaajo ayaa qoraalka ku sheegay inay tahay masuuliyad ka baxsan awooda Hay’adaha Dawladda Federaalka in lagu guuro hanaanka Baarlamantaariga lana baabiiyo xafiiska Ra’iisul Wasaaraha.
Sidoo kale Farmaajo sheegay inay aad muhiim u tahay in la dhagaysto codka Puntland, iyadoo ka maqnayd madashii lagu gaaray goaankaas.
Hoos ka akhriso qoraalka Farmaajo.
Waxaan si dhow ula soconnaa dhaqdhaqaaqyada ku aaddan wax ka beddelka qaabka dowladnimada, hanaanka baarlamaaniga ah, habka doorashooyinka qof iyo codka ah iyo hannaanka xisbiyada badan. Wax ka bedelka qodobadaas oo aan loo marin wadada saxda ah waxay keeni karaan in dalku uu dib ugu noqdo xasilooni darro iyo hubanti la’aan.
Sidaas darteed in laga guuro hannaanka Baarlamaaniga ah ee ka jira dalkeenna, lana laalo xafiiska Ra’iisul Wasaaraha waa masuuliyad ka baxsan awoodaha Hay’adaha Dawladda, maadaama ay taabanayso masiirka dalka.
Baarlamaanka Federalka Soomaaliya waxaa waajib qaran iyo mid taariikhi ah ka saaran yahay in ay ka digtoonaadaan ansixinta qodobbada taabanaya jiritaanka dowladnimada ee aan loo marin hannaanka saxda ah, kuwaas oo abuuri kara kalsooni darro bulsho iyo jahwareer siyaasadeed.
Waxaan garowsannahay ahmiyadda ay leedahay in la maqlo codka Dowlad Goboleedka Puntland oo ka maqan Madasha Wadatashiga Qaran si loo xaqiijiyo matalaaddooda ku aaddan arimaha masiiriga ah, taas oo aan looga maarmayn dawlad dhiska Soomaaliya.
Shacabka Soomaaliyeed xaq ayey u leeyihiin in ay hoggaankooda ku soo doortaan codkooda, si xor iyo xalaal ah oo daahfuran, waafaqsanna xeerarka iyo shuruucda dalka.
Wa billaahi Al-towfiiq
About The Author
