PUNSAA “Lama aqbali karo falka maanta ka dhacay Garowe… waa in la joojiyo isticmaalka awoodda, hadallada xanafta leh iyo si xun u adeegsiga Baraha Bulshada”
07 Nov 2023 (Puntlandes.com) Dallada Bulshada Rayidka Puntland, (PUNSAA), ayaa warsaxaafadeed kasoo saartay iska hor imaadkii maanta ka dhacay magaalada Garowe taas oo sababa dhimasho iyo dhaawac.
PUNSAA ayaa qoraalka ku tiri “Lama aqbali karo falka maanta ka dhacay Garoowe… waa in la joojiyo isticmaalka awoodda, hadallada xanafta leh iyo si xun u adeegsiga Baraha Bulshada.”
Hoos ka akhriso warsaxaafadeedka PNSAA
FAAFIN DEG-DEG AH:
Waxaa foolxumo iyo masuuliyad darro weyn ah in muwaadiniinta reer Puuntland u dhintaan si micno darro ah iyadoo laga baaqsan karo falalka liddiga ku ah amniga iyo badqabka muwaadiniinta.
Falkii maanta ka dhacay caasumada Puntland ee Garowe wuxuu ahaa mid aan marnaba la aqbali karin, waxayna Dallada Bulshada Rayidka ka digaysaa ku xad gudubka xuquuqda iyo sharafta dadweynaha, iyadoo waajib ay tahay in lala xisaabtamo falalka gurracan cidda masuuliyadeeda leh.
Waxaan ku baaqaynaa in la joojiyo wax kasta oo xaalad amni darro abuuri karta taasoo ay ugu weyntahay isticmaalka awoodda, hadalada xanafta leh iyo si xun u adeegsiga barasha bulshada.
Ugu dambayn, PUNSAA waxay ka tacsiyeynaysaa muwaadinadii ku geeriyootay dhacdada maanta iyadoo Caafimaad degdeg ah u rajaynaysa intii ku dhaawacantay.
Mahadsanadiin
Dallada Ururada Bulshada Rayidka Puntland (PUNSAA)
About The Author
