RW hore Kheyre oo bogaadiyey una hambalyeeyey Ciidamada Puntland oo guulo waaweyn kasoo hoyey ciribtirka Argagaxisada
11 Jan 2025 (Puntlandes.com) Raysal Wasaarihii hore ee Soomaaliya Xasan Cali Kheyre ayaa qoraal ku bogaadiyey uguna hambalyeeyey Ciidamada Geesiyaasha ah ee Puntland oo guulo waaweyn kasoo hoyey ciribtirka Argagaxisada ku dhuumaalaysanaysa buuralayda Cal-miskaad ee gobolka Bari.
Hoos ka akhriso qoraalka RW Kheyre:
Waxaan shacabka, ciidamada, iyo dowladda Puntland ugu hambalyeynayaa guulaha ay ka soo hooyeen hawlgalka lagu ciribtirayo argagaxisada ee ka socda buuralayda Calmiskaad ee Gobolka Bari.
Argagaxisadu waa caqabadda iyo cadawga ugu weyn ee maanta hortaagan nabadda, horumarka, iyo dowladnimada Soomaaliyeed. Waxaan hoggaanka dowladda iyo ciidamada Puntland ku bogaadinayaa go’aankan masiiriga ah ee ay ku soo afjarayaan khawaarijta naf-la-caaarriga ah iyo argagaxisada shisheeyaha ah ee ku dhuumaaleysanaysa buuralayda Gobolka Bari.
Waxaan shacabka Puntland ku boorrinayaa in ay hiil iyo hoo la garab istaagaan halyeeyada naftooda u huraya difaaca sharafta, dadnimada, iyo deegaannada Puntland. Waxaana dhammaan ummadda Soomaaliyeed, shacab iyo dowladba, ugu baaqayaa in loo midoobo ciribtirka khawaarijta arxanka daran ee khatarta ku ah horumarka dalka, dadka, iyo dowladnimada Soomaaliyeed”.
About The Author
