SAWIRRO: Ciidanka Puntland oo Aqoonsiyada xubno Ajaaniiba oo katirsan argagixisada Daacish, ka helay qaar kamid ah Talisyadii…..
16 Jan 2025 (Puntlandes.com) Aqoonsiyada xubno Ajaaniib ah oo katirsan argagixisada Daacish, ayna ku jiraan Rag u dhashay Boqortooyada Sacuudi Carabiya ayaa laga helay qaar kamid ah Talisyada iyo goobaha kale ee lagala wareegay argagixisada.
Mid ka mid ah saldhigyadii Argagixisada Daacish ee Buuraha Calmiskaad ayey ciidanka Puntland ka heleen Baasaboor nin Sacuudiyaan ah oo ay ka muuqato dal-ku-galka Masar iyo Itoobiya oo ah halka uu soo maray.
Tani waxay muujinaysaa in ninkan Argagixisada ah uu Puntland kaga soo galay dhinaca Itoobiya labo todobaad ka hor, iyadoo sii xoojineysa tuhunkii ahaa in argagixisada ajaaniibta Daacish ee ku dhuumaaleysanaya dhulka buuraleyda Puntland ay ka kala yimaadeen dalal badan.
In Anaajiibtii Argagixisada Daacish ay Baasaboorada ka cararaan, waxay muujinayaan heerka jabka gaaray Kooxdaas, sidaas oo kale in Ajnabi Sacuudiyan ah aan kasoo dagin Soomaaliya, iskuna maray Masar ilaa Itoobiya soo galo Buuraleyda Calmiskaat wax ka yar 2 bilood gudahood ilaa laga soo bilaabo qaadashada Baasaboorkiisa, waxay muujinaysaa halista kooxdan iyo in aysan Puntland ku koobneyn.
Howlgalka ciribtirka argagixisada ee Puntland ayaa daah qaaday baaxada duullaanka argagixisada caalamiga ah iyo qorshaha ay ku doonayeen dhibaateynta shacabka Puntland ee wadajirka, nabadda iyo horumarka jecel. Ciidamada Daraawiishta Puntland ayaa maalmihii la soo dhaafay guulo ka gaaray howlgalka Ciribtirka Argagixisada, saldhigyo ay u yaalleen agabyo kala duwan cagta la mariyay.
About The Author
