DEG DEG: Sweden oo joojisay qaxootiga Soomaalida
24 Nov 2015 (Puntlandes) Dowlada Sweden ayaa maanta shaacisay sharciyo cusub oo aad loogu yaraynayo tirada qaxootiga dalka Sweden soo galaya, iyadoo ay dowladu wax ka badel ku samaysay sharciga Qaxootiga dalka soo galaya.
Sharcigan cusub ayaa qabanaya guud ahaan qaxootiga dalka Sweden soo galaya, isagoo waliba si gaar ah Soomaalida saameyn weyn ugu yeelan doona.
Sharcigan ay dowlada soo bandhigtay ayaa dhaqan gali doona bisha April ee sanadka 2016 waxaa ka mid ah:
- In dhamaan qaxootiga hada ka dib iska dhiiba Sweden la siinayo sharci ku meel gaar ah oo keliya, marka laga reebo dadka caruurta leh ee horay isku dhiibay iyo dadka xeryaha qaxootiga ay Sweden ka soo qaaday.
- Dowlada ayaa aad u yareyn doonta xuquuqda mideynta qoysaska, iyadoo sidoo kale adkeyn doonta shuruuda in aad biilan karto reerkaaga iyo in aad guri haysato. Qaasatan qodobkaan ayaa aad u qaban doona qoysaska Soomaalida.
- Qodobkii ugu muhiimsanaa ee Soomaalida sharciga lagu siin jiray ee lagu magacaabo “Övriga skyddsbehövande” ayaa meesha guud ahaan laga saari doonaa. Iyadoo qodobkii kale ee dadka dhibaatada qaaska ah ay haysato ee lagu magacaabo “synnerligen eller särskilt ömmande omständigheter” isaga aad loo adkeyn doono oo dad qaas ah oo si bani’aadinimo oo keliya la siin doono. Isbedalka lagu sameeyay labadaan qodob ayaa guud ahaan irdaha ka xiraya qaxootiga Soomaalida oo horay sharciga lagu siin jiray labadaan qodob mid ka mid ah.
- Waxay kale oo Sweden bilaabi doontaa in dhamaan dadka raacaya gaadiidka tareenada iyo diyaaraha la weydiin doono aqoonsi.
- Waxaa sidoo kale wax laga badali doonaa baaritaanka da’da dadka caruurta isku dhiiba.
Sharcigaan cusub ayay dowladu sheegtay in uu jiri doono muddo sadex sano ah oo ka bilaabata bisha April ee sanadka soo socda. Wasiirka Deegaanka ahna raysal wasaare ku xigaanka Åsa Romson ayaa ilmaynaysay markii sharcigaan ay ku dhawaaqeen iyada iyo raysal wasaaraha.
Sharcigan cusub ayaa ah kii ugu adkaa ee lagu Yareeyo qaxootiga dalka Sweden soo galaya, iyadoo Sweden ay a heer noqon doonta wadamada deriska ah ee Denmark iyo Norway.
About The Author
