Waa kuma Guddoomiyaha cusub ee uu u magacaabay madaxweyne Xasan Sheekh Maxkamadda Sare?
4 May 2016 (Puntlandes) Madaxweynaha DFS Xasan Sheekh ayaa maanta u magacaabay Guddoomiyaha Maxkamadda sare ee Soomaaliya Ibraahim Iidle Saleebaan, kadib markii uu xilka ka qaaday Guddoomiyihii Maxkamadda sare Ceydiid Ilka-Xanaf, kaasoo xilkan hayay tan iyo xilligii dowladdii KMG aheyd.
Khuburada sharci ku xeel dheer ayaa ku tilmaamaya qaabka uu mafaxeyne Xasan u maray xil ka qaadista Guddoomiyihii Maxkamadda sare Ceydiid Ilka-Xanaf ay tahay mid aan sharci aheyn, sidoo kale waxaa ay ku soo aadeysaa,iyadoo la galay marxalad kala guur, isla markaana dowladda Federaalka ee hada jirta ay u harsan tahay wax ka yar afar bilood.
Khuburada ayaa intaas kusii daray inuu uga danleeyahay madaxweyne Xasan xilka ka qaadida Guddoomiyihii Maxkamadda sare Ceydiid Ilka-Xanaf u diyaargarow dagaal soiyaasadeed oo uu isku diyaarinayo inuu u galo sidii uu mar kale dib ugu soo noqon lahaa Kuriga Madaxtinimada ee Villa Somalia.
Guddoomiyaha cusub ee Maxkamadda Sare Ibraahim Iidle Saleebaan ayaa isla maanta loo dhaariyay xilka Guddoomiyaha, kadib munaasabad ka dhacday Madaxtooyada Villa Somalia.
Ibraahim Iidle Saleebaan ayaa ahaa Garyaqaanka Guud ee Somaliland, kaasoo xilka iska casilay lix maalmood ka hor, iyadoo warqadiisa istiqaalada isagoo ka maqan Hargeysa u gudbiyay Madaxweynaha Somaliland si uu uga aqbalo.
Madaxweyne Axmed Siilaanyo ayaa bishii July ee sanadkii 2011 u magacaabay Ibraahim Iidle Saleebaan Garyaqaanka Guud ee Somaliland.
Wararka qaar ayaa sheegaya in ka hor inta uusan is casilin uu ku wargeliyay Maamulka Somaliland inuu siminaar u aadayo dalka Koofur Afrika.
Magacaabista Ibraahim Iidle Saleebaan waxay maamulka Somaliland ku noqoneysa mid lama filaan ah, maadaama muddo todobaad gudihiis inta uu iska casilay xilkii uu ka hayay Maamulka Somaliland, looguna magacaabay xil sare oo ah Maxkamadda sare ee dowladda Federaalka ah ee Soomaaliya.
Ibraahim Iidle Saleebaan ayaa ka soo jeeda Gobolka Togdheer, waxaana ay is xigaan Guddoomiyaha Golaha Wakiilada Somaliland C/raxmaan Cirro.
Guddoomiyaha cusub ee Maxkamadda sare Ibraahim Iidle Suleymaan iyo Guddoomiyihii hore Ceydiid Ilka-Xanaf ayaa labadaba ka soo jeeda Gobolka Togdheer.
Ibraahim Iidle Saleebaan ayaa xilka garyaqaanka Guud ee Somaliland iska casilay lix maalmood ka hor
About The Author
