FaalLo: In Heshiisyadii hore ee Garowe & Madasha dib loogu noqdo si Muqdisho loogu soo daro Aqalka Sare oo Socon wayday!!
3 June 2016 (Puntlandes) Warbaahinta Puntlandes ayaa heshay War murtiyeedlii kasoo baxay Shirkii Madaxda Soomaalida uga socday muddada Todobaadka ku dhow, kaasoo waxayaalaha ugu Muhiimsan ee kasoo baxay ay tahay:
- Soo Afjarida murankii ahaa in Heshiisyadii hore dib lagu noqdo oo Muqdisho lagu soo daro Aqalka Sare
- Gudiyada Doorashada ee Heer Federaal iyo dawlad Goboleed oo lagu go’aamiyey in ugu dambayn 6da bishan oo ku beegan Isniinta la magcaabo ayna shaqadooda bilaabaan 10ka bishan aynu ku jirno.
- Qaybinta inta dawlad Goboleed kasta ay ka helayso Aqalka Hoose ee Baarlamaanka maadaama ay Doorashooyinku k adhacayaan Xarumaha dawlad Goboleedyada
- In waqti kororsi uusan jirayn
- on 20ka bishan uu Baydhabo ka dhacayo shir looga hadlayo 135kii oday …
Madaxweynaha DFS Xasan Sheekh iyo Kooxda DAMUL JADIID ee uu ka tirsan yahay ayaa maxay Miiska wada hadalada keeneen in Heshiisyadii hore ee la gaaray dib loogu noqdo oo Aqalka Sare Kuraas laga siiyo magaalada Muqdisho, taasoo wax u dhimaysa hab qaybsiga Deegeen ee Heshiiskii hore ay Sadbursiga ku heshay Beesha madaxweynaha oo ku qaadatay Kuraas aad u badan 3.5 Gobol.
Soo jeedintaas ayaa waxaa ku gacansayray madaxdii kale oo ay ugu horeeyaan Madaxweynayaasha Puntland iyo Jubaland Dr cabdiwali Maxamed Cali Gaas iyo Axmed Maxamed Islaan (Axmed Madoobe), kadibna waxaa la go’aansaday inaan dib loogu noqon Heshiisyadii hore loo gaaray.
Warmurtiyeedlka maanta kasoo baxay Madasha Wadatashiga ayaan haba yaraatee lagu soo qaadin Arintii Muqdisho inay Aqalka Sare qayb ka hesho, laakiin bedelkeed sidii ay Warbaahinta Puntlandes shalay Akhristayaasheeda u soo bandhigtay waxay madaxdu magacaabayaan Gudi kasoo talo bixiya Maqaamka magaalada Muqdisho sida uu Qorayo Dastuurka Soomaaliya marka laga reebo Firqada la hadlaysay in Caasimadda meesha noqonaysa la isku raacayo.
Qodoka 11aad ayaa ka hadlaya Gudiga loo saaray oo muddo lixdan maalmood ah kasoo tala bixinaya “maqaamka gaarka ah ee caasimadda Muqdishu yeelanayso oo uu dastuurku tilmaamay” halkaas waxaa kusoo gabagaboobay Muqdisho iyo Aqalka Sare.
Qodoka 11aad ayaa u qoran sidatan hoose:
11. Madasha Hoggaanka Qaran waxay go’aansatay in matalaada iyo maqaamka magaalada Muqdisho loo saaro guddi heer qaran ah oo ka kooban xubno ka kala socda heer federaal iyo heer maamul-goboleed,gudigaas oo ka soo talo bixin doona maqaamka gaarka ah ee caasimadda Muqdishu yeelanayso oo uu dastuurku tilmaamay. Gudigaasi wuxuu howshiisa ku soo dhamaystirayaa muddo lixdan maalmood gudahooda oo ka bilaabanaysa 4-ta Juun 2016.
Akhriso Warmurtiyeedka halkan ama meesha ka hoosaysa isagoo Qoraal ah.
Madasha Hoggaanka Qaranka Soomaaliyeed
Muqdisho, 2-da June 2016
WAR-MURTIYEED:
Madasha Hoggaanka Qaran ayaa kulan ku yeelatay magaalada Muqdisho 29-ka May ilaa 02- da June 2016. Kulanka oo uu shir-gudoomiyay Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa waxaa ka soo qayb-galay; Guddoomiyaha Baarlamaanka Federaalka, Mudane Maxamed Cusmaan Jawari; Ra’iisal Wasaaraha Xukuumadda Federaalka, Mudane Cumar Cabdirashiid Cali Sharmaarke; Ra’iisul Wasaare Ku-Xigeenga Xukuumadda Federaalka, Mudane Maxamed Cumar Carte; Madaxweynaha Puntland, Mudane Cabdiweli Maxamed Cali-Gaas; Madaxweynaha Jubbaland, Mudane Axmed Maxamed Islaan; Madaxweynaha Koonfur Galbeed, Mudane Shariif Xasan Sheekh Aadan; iyo Madaxweynaha Galmudug, Mudane Cabdikariim Xuseen Guuleed.
1. Madasha Hoggaanka Qaran waxay tacsi u dirayaan shacabka, qoysaska iyo eheladii ay ka baxeen mas’uuliyiin iyo xubno kale oo shacabka qiimo ku lahaa oo fiidnimadii xalay ku shahiiday weerar argagixiso oo lagu qaadey mid ka mid ah hoteellada magaalada Muqdisho. Madashu waxay cambaaraynaysaa weerada waxashnimo ee ee ay argagxisadu la beegsanayso shacbiga aana wax galabsan.
2. Madasha Hoggaanka Qaran waxay soo dhaweysay xeerkii Madaxweynaha Jamhuuriyadda Federalka Mudane Xasan Sheekh Maxamuud uu ka soo saaray hannaanka geedi-socodka doorashada ee ay horay ugu heshiiyeen 12-kii Abriil 2016. Madasha Hoggaanka Qaran waxay mar kale ku celisay ballanqaadkeedii hore ee ahaa inay ka go’an tahay in ayan jiri doonin muddo kordhin lagu sameeyo muddo-xileedka uu dastuurku u xaddiday hay’adaha sharcidejinta iyo fulinta iyo in doorashooyinka ay dhacayaan xilliga loogu talo galay.
3. Madasha Hoggaanka Qaran waxay ku heshiisay qaababka faahfaahsan ee hannaanka doorashada, oo ay ka mid yihiin waajibaadka shaqo ee Guddiga Heerka Federaal ee Hirgelinta Doorashooyinka Dadban (GFHD) iyo Guddiyada Hirgalinta Doorashada Dadban ee Heerka Dowlad Goboleed (GHDG). Guddiga Xallinta Khilaafaadka Doorashada (GXKHD) waxa looga hadlayaa fadhiga soo socda ee Madasha Hoggaanka Qaran ee 20-ka Juune ka dhacaya Baydhabo.
4. Madashu waxay mar kale ku celisay inay ka go’antahay xaqiijinta ka-qaybgalka siyaasadeed ee haweenka iyo metelaadooda. Sidoo kale Madashu waxay isku raacday in la qaado tallaabooyin dheeraad ah oo kor loogu qaadayo ka-qaybgalka haweenka iyo metelaadooda. Madashu waxay soo dhawaynaysaa magacaabida uu Madaxwaynaha Jamhuuriyadu u magacaabay guddi heer qaran oo u ololeeya taabagelinta iyo xaqiijinta in la gaaro qoondada loo xaddiday haweenka Somaliyeed.
5. Madasha Hoggaanka Qaran waxay si guud isugu raacday in la sameeyo khariidad/tub siyaasadeed oo qeexan ee 2016 ilaa 2020, si loo xaqiijiyo gaaritaanka doorashooyin leh halbeeg caalami ah (qof iyo cod) oo dhaca marka la gaaro 2020.
6. Madasha Hoggaanka Qaran waxay ku heshiisay in si dhakhsa ah loo dhiso Guddiga GFHD iyo Guddiyada GHDG, iyadoo la rabo in xubnaha guddiyadaas la soo magacaabo
ugu dambayn 6-da bisha Juun 2016, shaqadooduna billaabaanto 10-ka bisha Juun 2016. Guddiga GFHD wuxuu u xilsaarnaan doonaa dejinta qorshe hirgelin oo faahfaahsan iyo jadwalka doorashada (kalandarka doorashada) iyo inuu ku dhawaaqo taariikhda ay dhacayaan doorashooyinka sanadka 2016. Guddiyada GHDG, waxey u xilsaarraan doonaan, fulinta dhammaan howlaha doorashooyinka heer dowlad goboleed.
7. Marka Guddiga Heerka Federaal ee Hirgelinta Doorashooyinka Dadban ay ku dhawaaqaan natiijada kama dambeeysta ah ee liiska 275-ta xildhibaan waxaa kama dambeeynta saxiixaya Madaxweynaha Jamhuuriyadda isaga oo ku soo saaraya faafinta rasmiga ah.
8. Madashu, waxaa ay isku raacday in xubnaha ergada dooranaya halkii xildhibaan ee aqalka hoose ay noqdaan 51 xubnood, halka markii hore ay aheyd 50 xubnood.
9. Ayadoo laga duulayo hehsiiskii horay loo gaaray ee ahaa in doorashada Xildhibanada qaran ay ka dhacdo Xarumaha dowlad goboleedyada dalka ka jira, ayaa Madasha Hogaamiyayaasha qaranku si guud ugu heshiisay qeybinta xildhibaanada sida ku cad shaxda qaybinta xildhibaannada iyadoo saldhig looga dhigayo labadan qodob:
a. Qaybinta xildhibaanadan waa qaybin ku eg doorashada 2016 kaliya.
b. Qaybintani ma qeexeyso sida deegannada loo kala daganyahay, ee waa heshiis ku meel gaar ah oo ku salaysan 4.5, kuna eg xaaladda doorasho ee 2016-ka oo kaliya.
10. Madasha, waxay si qotodheer u dul istaagtay liiska odayaasha 135-ka, waxayna dood dheer ka dib isla garteen in dhamaystirka liiska kama dambaysta ah lagu go’aansado shirka Madasha ee lagu qaban doono Baydhabo 20-ka bisha Juun 2016.
11. Madasha Hoggaanka Qaran waxay go’aansatay in matalaada iyo maqaamka magaalada Muqdisho loo saaro guddi heer qaran ah oo ka kooban xubno ka kala socda heer federaal iyo heer maamul-goboleed, gudigaas oo ka soo talo bixin doona maqaamka gaarka ah ee caasimadda Muqdishu yeelanayso oo uu dastuurku tilmaamay. Gudigaasi wuxuu howshiisa ku soo dhamaystirayaa muddo lixdan maalmood gudahooda oo ka bilaabanaysa 4-ta Juun 2016.
12. Madasha Hoggaanka Qaran dood dheer ka dib waxay si wada jir ah isugu raacday;
a. Ansaxinta Siyaassadda Amniga Qaranka Soomaaliyeed (National Security Policy) oo ay xukuumaddu soo gudbisay.
b. Dhisidda Gudiga Aminga Qaranka sida ku cad Siyaasadda Amniga Qaran.
13. Madasha Hoggaanka Qaran waxay ku heshiisay in shirka soo socda ee Madasha lagu qabto maagalada Baydhabo oo xarun u ah Dowlad Goboleedka Koonfur Galbeed 20-22- ka bisha Juun 2016.
14. Madasha Hoggaanka Qaran waxay ugu baaqaysaa saaxiibada Soomaaliya ee caalamka inay taageeraan diyaarinta iyo hirgelinta hanaanka doorashada kuna qabsoonto waqtigii loogu talagalay.
Puntlandes.com
About The Author
