Sawirro+Warbixin:-Wasaarada Caafimaadka Dowlada Puntland Oo Gacan Ka Gaystay Laba Caruur Ah Oo Araga Indha Loo Fiiqay
Laba Carruur oo reer Puntland ah oo ku noolaa gobolka Karkaar ayaa aragooda dib u helay kadib markii wasiirka caafimaadka dowladda Puntland Dr. Cabdinaasir Cuuke uu dhawaan arrintaas gacan weyn ka geystay
Carruurtaan oo muddo indha la’ayd waxaa dhawaan indhaha loogu qalay Garowe gaar ahaan Xarunta Indhaha ee Dr. Cabdicasis. Carruurtu waxay ka soo jeedan deegaanka miyiga ee Degmada Rako, oo ka tirsan Goblka Karkaar.
Wasiirka caafimaadka Puntland Dr. Cuuke oo kormeer shaqo ku tagay magaalada Qardho ayaa helay warbixinta carruurtaan, wuxuuna ku taliyay in si degdeg ah lagu keeno magaalada Garowe, si loogu geeyo Dr. Cabdicasiis oo qaabilsan cudurada Indhaha.
Baaritaankii Dhakhtarku waxaa lagu sheegay in wax laga qabankaro, taasoo uu dhakhtarku ugu dambayn uu fuliyey isagoon wax kharash ah ku dallacin.
“Maanta waad arkaysaan ilmihii oo soconaya, wax arakaya ,” ayuu yiri wasiirka caafimaadka Puntand Dr, Cabdinaasir Cuuke, “ Ilmahaas haddii la isla eegay sababta ay araga u waayeen waa Cudur Jadeeco iyo nafaqo darro isugu darmay. Waalidka haddii la waraystayna waxay sheegeen inaan hore Jadeeco looga tallaalin,” ayuu yiri wasiirku.
Wasiirka caafimaadka ayaa ku wacyi geliyay bulshada inay ilmahooda tallaalaan, si uu ubadkooda uga badbaado cudurada dilaag ah ama saamaynta ku reeba nolashooda.
Dr. Cabdinaasir Cuuke ayaa ugu dambayn mahad celin balaaran ujeediyay Marwo Iftin Yusuf Maxamed oo qeyb weyn ka qaadatay howshaan iyo Dr. Cabdicasiis wuxuuna ilaaheey uga baryay inuu ajar ka siiyo hawshaas mutadawacnimada ah oo ilmahaas mustaqbalkooda iftiimisay.
Axmed Cawil
Sawirrada Hoos Ka Eeg
About The Author
