Magaalada Gothenburg oo ay ka socoto qaban qaabo aad xoogan oo lagu soo dhawaynayo madaxweynaha dawladda Puntland
12 May 2017 (Puntlandes) Magaalada Gothenburg ee ah Caasimada labaad ee dalka Sweden ayaa waxaa ka socoto qaban qaabo aad xoogan oo loogu jiro soo dhawaynta wafdi ballaraan oo hogaaminayo madaxweynaha dawladda Puntland Dr Cabdiweli Maxamed Cali Gaas.
Madaxweynaha ayaa sida ay ogaatay Warbaahinta Puntlandes waxa uu kusoo wajahan yahay Magaalada Gothenburg maalinta Khamiista ah ee bishan May ay tahay 18ka, iyadoo Jaaliyadda Puntland ee ku dhaqan Magaaladaas iyo hareeraheeda ay si wayn ugu diyaar garoobeen soo dhawaynta madaxweynaha iyo wafdigiisa.
Dr Cabdiweli ayaa iminka ku sugan magaalada London ee dalka UK halkaasoo uu uga qayb galay shir ay Soomaalida u qabatay dawladda dalkaasi, kaasoo qabsoomay shalay oo ay bishu ahayd 11ka.
Magaalada Gothenburg ayaa waxaa ku nool Jaaliyad ballaaran oo reer Puntland ah oo aad u daneeya horumarka Puntland, qayb lixaad lehna kasoo qaatay ka shaqaynteeda. Madaxweyne Dr Cabdiweli ayaa uga warbixin doona Jaaliyadda Puntland horumarka ay xukuumadiisu ka wado dalka iyo sidii ay u labo laabi lahaayeen ka shaqaynta horumarka dalka.
Shacabka reer Puntland oo ah shacab horumarka dalkooda aad u jecel ayaa u haya madaxweynaha niyad wanaag iyo taageero, maadaama uu yahay madaxweynihii ugu waxqabadka badnaa ee Puntland soo mara intii ay jirtay.
Puntlandes.com
About The Author
