Shir deg deg ah oo maanta la isugu yeeray Golaha Wasiirada Soomaaliya, maxay tahay sababtu?
6 Sept 2017 (Puntlandes) Golaha Wasiirada DFS ayaa maanta oo Arbaco ah yeelanaya shir deg deg ah oo aan caadi ahayn, waxaana Wasiirada lagu wargeliyay in shirka isugu yimaadaan 10-ka subaxnimo ee saaka.
Xalay ayaa Wasiirada fariimo loogu sheegay in kulan deg deg ah ay ka soo qeyb galeen loo diray, loomana sheegin ajandaha shirka.
Warar kala duwan ayaa ka soo baxaya Shirka deg dega ah ee Golaha Wasiirada oo ku soo aaday xilli xasaasi ah, oo dowladda Federaalka ay wajaheyso xaalado ka dhashay FADEEXOOYIN isdaba joog ah oo ay ku kacday DFS:
- Dhacdadii Bariire iyo qaabkii ay dowladu u maaraysay ama ay uga hadashay!!!
- Qalbi-Dhagax oo ah Sarkaal sare oo ka tirsan ONLF oo ay dowladu u dhiibtey dalka Ethiopia.
- Qoraalkii kasoo baxay Xafiiska Raysul wasaaraha ee looga mabnuucay Golaha Wasiiradda inay isticmaalaan Saxaafadda iyo baraha Bulshada
- Qoraalkii kasoo baxay Xafiiska Wasiirka Arimaha Dibadda ee looga mabnuucay Shaqaalaha Wasaaradda iyo safiiradda inay isticmaalaan Saxaafadda iyo baraha Bulshada
- Qoraalkii FADEEXADDA Xambaarsanaa ee kasoo baxay Xafiiska Wasiirka Arimaha Dibadda ee dawladda Maraykanka looga baryayey inay duqayso Gobolada Soomaaliya gaar ahaan Gobolada Dhexe, iyadoo lagu caddeeyey qoraalkaas in maadaama uu madaxweynuhu haysto Dhalasho Maraykan ah ay DFS uga fadhido caawimaad Milateri dawlada Marayanka CAJIIB
Dowladda Soomaaliya ayaa wali wax jawaab ah ka soo saarin dhacdadii Bariire inkastoo uu dhacay is afgarad dhex maray dowladda iyo odayaasha ka soo jeeda dadkii lagu dilay Bariire, kaasoo sababay in la aaso meydadkii la diidanaa in la aaso markii jahwareer uu ka dhashay cida leh mas’uuliyada weerarkii Bariire.
Sidoo kale Xukuumadda iyo Madaxtooyada ayaa wali ka hadlin arrinta C/kariin Shiikh muuse (Qalbi Dhagax) oo todobaad ka hor loo gacan geliyay Itoobiya, waxaana tallaabadan ka dhalatay buuq siyaasadeed iyo cambaareyn ka timid Xildhibaano iyo siyaasiyiin.
Wararka laga helayo Xafiiska Raysul Wasaaraha Soomaaliya Xasan Cali Khayre ayaa sheegaya in Dowladda Federaalka Soomaliya ay cadaadis kala kulantay Dowladda ethopia ee ku aadan arinta C/kariin Shiikh muuse (Qalbi Dhagax),islamarkaana mowqifka Dowladda Ethopia uu yahay in Dowladda Soomaliya ay qirato in ninkaas ay iyada gacan galisay. Shalay ayaa Xafiiska Raysul Wasaaruhu waxa uu shaaciyey in Khayre uu khadka telefoonka shir kula qaatay Dhiggiisa Dalka Itoobiya Hailemariam Desalem taasoo looga dhaadhiciyey Qirashada.
Puntlandes.com
About The Author
