Sawirro: Axmed Madoobe oo isku diiwaan galiyey Musharaxnimada Madaxweynaha Jubbaland (muuqaal)
20 July 2019 (Puntlandes) Madaxweynaha Dowlad Goboleedka Jubbaland Axmed Maxamed Islaam (Axmed Madoobe) ayaa maanta oo sabti ah qaatay warqada is diiwaan galinta Musharaxnimada Madaxweynaha Dowlad Goboleedka Jubbaland.
Axmed Madoobe oo saxaafada kula hadlay banaanka Xarunta gudiga madaxabanaan ee Xuduudaha iyo Doorashooyinka isagoo sheegay in uu maray hanaanka sharciga ah ee looga baahan yahay in ay maraan dadka u tartamaya xilka madaxweynaha.
Waxaa kale oo Madaxweynahu uu ugu baaqay musharaxiinta kale in ay wadadaas maraan oo aanay bulshada ku abuurin hadalo nacayb iyo fowdo abuuraya taas oo aan waxba usoo kordhin doonin.
Madaxweynahu wuxuu sheegay in awood dastuuri ah uu u leeyahay magacaabista gudiga doorashooyinka iyo xuduudaha balse isaga iyo musharaxiinta kale ay u siman yihiin loona baahan yahay in loo hogaansamo waxaa uu intaas ku daray in dhamaan xuquuqaha dastuuriga ah ee Madaxweynaha aanay gorgortan galaynin sida ilaalinta nabadgalyada iyo xasiloonida guud.
Qaar kamid ah musharaxiinta kasoo qaybqaatay halgankii Jubbaland loosoo maray ayuu ku booriyay in ay dib u eegan halka laga yimid iyo dhibkii looso maray dhismaha Jubbaland isla markana aanay u durbaan tumin shaqsiyaad kor ka yimid oo aan ka warqabin duruufaha dadka ree Jubbaland.
Dhanka kale Musharaxiinta u taagan xilka Madaxweynaha Jubbaland ayaa dhowaan shaaca ka qaaday inay kalsoonidii kala noqdeen guddiga doorashada, iyagoo sheegay in sida haatan wax ku socdaan ay keeni karto in Jubbaland ay yeelato labo Madaxweyne iyo labo Baarlamaan, iyagoo salluugsanaa qaabka Guddiga doorashada wax u wado.
Puntlandes.com
About The Author
