Wasiir Janan oo Beledxaawo gaaray
04 Feb 2020 (Puntlandes) Wasiirka amniga maamulka Jubbaland, Cabdirashiid Xasan Nuur (Janan) ayaa gaaray magaalada Beled-Xaawo ee gobolka Gedo.
Diyaarad milatari oo ay leedahay dowladda Kenya ayaa lagu soo warramayaa inay saaka ka soo qaaday magaalada Nairobi ee xarunta dalkaasi, oo uu ku sugnaa afartii cisho ee la soo dhaafay, isaga oo ka degtay garoon ku yaalla gudaha degmada Beled-Xaawo.
Ilo deegaanka ayaa sheegay in wasiir janan si weyn loogu soo dhoweeyey halkaasi, islamarkaana ay u soo banaan baxeen shacabka iyo maamulka maamulkaasi.
Sidoo kale wararka ayaa intaasi ku daraya in goor dhow uu qaban doono shir jaraa’id, islamarkaana uu kaga warbixin doono xarigii loogu geystay magaalada Muqdisho.
Safarka uu Janan haatan ku tegay gobolka Gedo ayaa ku soo aadaya, iyadoo hay’adda xuquuqda aadanaha ee Amnesty International Kenya ka dalbatay inay ku wareejiso dowladda dhexe, si loo horkeeno cadaaladda.
28-kii bishii hore ayaa Booliska Soomaaliyeed wuxuu sheegay in wasiir Cabdirashiid Janan uu ka baxsaday xabsiga, kaas oo 31-kii bishii August ee 2019-kii laga qabtay garoonka diyaaradaha ee magaalada Muqdisho.
Puntlandes.com
About The Author
