Akhriso Wasaaradda Amniga oo war saxaafadeed cusub ka soo saartay Arrinta Sheekh Shariif

24 Marso 2020 (Puntlandes) Wasaaradda Amniga Gudaha ee Xukuumadda Soomaaliya ayaa war saxaafadeed ka soo baxay waxay waxba kama jiraan ku tilmaamtay eedeymaha lagu xusay qoraalkii ka soo baxay Madasha Xisbiyada Qaran, kaasoo lagu sheegay in hey’adaha Amniga ay abaabuleen weerar ka dhan ah Madaxweynihii hore ee Soomaaliya Shariif Sheekh Axmed.

War saxaafadeedka ayaa lagu sheegay in Madaxweynaha haatan xilka haya iyo labadii Madaxweynayaal ka horeeyay ay dhammaantood amnigooda sugaan askar ka wada tursan Ciidanka Ilaalada Madaxtooyada Qaranka, sidaas darteed aysan suura gal aheyn warar haatan la faafinayo.

“Waxaanu adkeyneynaa in Madaxweynayaashii hore Shariif Sheekh Axmed iyo Xasan Sheekh Maxamuud ay yihiin Madaxweynayaal dalkaan ka soo samata bixiyay marxalada adag, Qarankana ay ku leeyihiin tixgelin gaar ah amnigooduna uu yahay waajib Qaran oo ay u heellan yihiin ciidamada loo igmaday ilaalinta Madaxda Qaranka soo martay” ayaa qoraalka lagu yiri

Goor sii horeysay qoraal uu bartiisa Facebook ku qoray Wasiirka Amniga Maxamed Abuukar Islow Ducaale ayaa lagu tilmaamay waxba kama jiraan wararka sheegaya in Ciidamo dowladeed la dul dhigay hoyga Sheekh Shariif.

Sidoo kale qoraalo ay bartooda Facebook soo dhigeen waqtiyo isu dhow Xildhibaan Mahad Salaad iyo Xildhibaan Axmed Fiqi ayay kaga digeen isku day Ciidamo ka amar qaata Madaxweyne Farmaajo ku weerari rabaan Hoyga Sheekh Shariif.

Habeenadii la soo dhaafay ayaa waxaa aad u jiray dhaq dhaqaaq ciidan oo ka socday dhanka degmada Wadajir iyo Ciidamo hubeysan oo lagu arkay nawaaxiga Isgoyska KM4, waxaana ciidamadaas loo qaatay inay weerar ku yihiin hoyga Sheekh Shariif oo aan ka fogeyn Isgoyska KM4, waxaana abuurmay jawi kacsanaan iyo xaalad loo qaatay inay dhalin karto dagaal, maadaama warkaas aad u qabsaday baraha bulshada.