Maxaa ka soo baxay kulankii xalay ee Musharaxiinta Madaxweynaha iyo Qoorqoor?
22 Nov 2020 (Puntlandes) Musharaxiinta Madaxweynaha ayaa kulan saacado badan socday oo illaa xalay xilli dambe la isla gaaray waxay la qaateen Madaxweynaha Galmudug Axmed Qoorqoor, kulanka waxaa uu ka dhacay hoyga Madaxweynihii hore Xasan Sheekh.
Kulankan ayaa waxaa ka qeyb galay Musharaxiinta Madaxweynaha ee ka soo jeeda Galmudug, sida Madaxweynihii hore Soomaaliya Xasan Sheekh, Ra’iisul Wasaarihii hore Xasan Cali Kheyre, Madaxweynihii hore Galmudug C/kariin Guuleed, Daahir Geelle, C/raxmaan C/shakuur iyo Mustaf Dhuxulow.
Musharaxiinta ayaa mid mid ula wadaagay dareenkooda iyo walaaca ay ka qabaan doorashada, waxaana Musharax walba uu u jeedinayay Qoorqoor inuu dib ugu noqdo Guddigii uu soo magacaabay oo ay ka dhex muuqdaan xubno dowladda soo qoratay Nabadsugid iyo shaqaale dowladeed
Intaas kaddib Madaxweyne Qoorqoor ayaa is difaacay, wuxuu ku dooday in maamulada kale ay soo qorteen rag xafiisyadooda ka shaqeeya, waxa isaga gooni ka dhigay, waxaa uu ka dalbaday inay isaga aaminaan oo go’aanka ugu dambeeya uu leeyahay.
Dood dheer kaddib Madaxweyne Qoorqoor ayaa dalbaday in fursad la siiyo, oo uu dib ugu noqdo Madaxda dowladda, waxaana uu ku casuumay Musharaxiinta Madaxweynaha inuu hoygiisa casho ugu sameyn doono.
About The Author
