Alshabaab oo dagaal kula wareegay Mahadaay
15 Mars 2021 (Puntlandes) Wararka ka imaanaya gobolka Shabeellada Dhexe ayaa waxay sheegayaan in Alshabaab ay dagaal kula wareegeen degmada Mahadaay oo qiyaastii 23-KM u jirta magaalada Jowhar ee xarunta maamulka HirShabeelle.
Dagaalamayaal ka tirsan Alshabaab ayaa maanta dhowr jiho kasoo weeraray Mahadaay, waxaana halkaas ka dhacay dagaal culus oo dhex maray Alshabaab iyo ciidamada dowladda Soomaaliya oo sanadihii lasoo dhaafay fariisimo ku kalaa gudaha magaaladaas.
Alshabaab ayaa waxaa u suurta gashay inay dagaal kula wareegaan degmada, waxayna ciidamadii dowladda ee magaalada laga saaray u carareen dhanka saldhigga ay ciidamada AMISOM ku leeyihiin Warshaddii hore ee hubka oo ku taalla duleedka degmada Mahadaay.
Wararkii u dambeeyey ee ka imaanaya degmada Mahadaay ayaa waxay sheegayaan in galabta kadib markii ay ka baxeen Alshabaab ay ciidamada dowladda Soomaaliya la wareegeen magaalada.
Dhanka kale warbaahinta taageerta Alshabaab ayaa baahisay in kooxdu ay la wareegtay Mahadaay, isla markaana hadda iyagu maamulayaan.
About The Author
