UK oo ka digtay muddo kororsi loo sameeyo muddo xileedka Hay`adaha dowladda Federaalka
27 Mars 2021 (Puntlandes) Wasiirka UK u qaabilsan arrimaha Afrika James Duddridge ayaa ka digay muddo kororsi loo sameeyo muddo xileedkii hore ee dowladda uu haatan waqtigeeda dhammaaday.
Wasiirka ayaa waxaa uu walaac ka muujiyay xal la’aanta arrimaha siyaasadeed, iyadoo aan weli is afgarad laga gaarin hannaanka doorashada.
“UK ma taageeri doonto ficil kasta oo horseeda hannaan doorasho kala qeybsan, mid barbar socota iyo in toos muddo kordhin loogu sameeyo muddo xileedkii hore”ayuu yiri James
Waxaa uu hoosta ka xariiqay in si degdeg ah loogu baahan yahay inay isu yimaadaan Hoggaamiyeyaasha Soomaaliyeed oo ay heshiis guud ka gaaraan hirgelinta geeddi socodka doorashada, iyadoo la raacayo heshiiskii doorashada ee 17 September iyo soo jeedintii guddiga farsamada ee Baydhabo.
Beesha Caalamka ayaa muddooyinkii u dambeeyay walaac ka muujinayay xaalada siyaasadeed ee dalka iyo is mari waaga ka taagan doorashooyinka, waxaana baaqyo toos ah ka imaanayaan caasimadaha dalalka taageera Soomaaliya.
Puntlandes.com
About The Author
