Tusmo Sicireedka Adeegatada Puntland (Consumer Price Index): Tirooyin iyo siyaasado
Wasaaradda Qorsheynta iyo xiriirka caalamiga Puntland waxay dhowaan soo saartay tusmo sicireedka adeegatada (Consumer Price Index). Tusmada oo ku salaysan isbarbardhigga sicirrada badeecooyin kala duwan oo uu dadku iibsado laga soo billaabo sanadkii 2005tii.
Puntland waxay yeelatay seddex maamul laga soo billaabo sanadkii 2005tii hase ahaatee waa seddexdii bilood ee sanadkan (2015) marka sicir-bararku kordhay boqolkiiba 112.52.
Tusmadu waxay muujinaysaa inay jiraan labo ilood oo uu sicir-bararka Puntland yimaado:
1- Warshadaha lacagaha daabaca ee Puntland oo maamulka Puntland uu xiray sanadkii 2008.
2- Isbedbeddelka sicirrada shidaalka xagaagii 2008.
Way jirtaa in maamulkii hore ee Puntland xiray warshadihii lacagta daabici jiray, weydiintuse waa: waa maamulkee? Ma maamulkii jiray 2008 ee Cadde Muuse mise maamulkii Faroole oo talada la wareegay Janaayo 2009kii? Hadduu maamulkii Faroole yahay kan xiray warshadihii lacagta, cilmibaarayaasha Wasaaradda Qorshayntu u xilsaartay diyaarinta tusmo sicireedka adeegatada, oo ay ka mid yihiin Bare Sare Maxamed Siciid Samatar iyo Madaxweyne Cabdiweli Maxamed Cali, waxay libin uusan lahayn siiyeen madaxweynihii Faroole ka horreeyay.
Tusmadu waxay tilmaamaysaa inuu jiro suuq lacagta qalaad oo furfuran, kana kooban laba qaybood: mid ku salaysan heerka sarrif ee suuqa iyo mid heerkiisa sarrif aad loo sarraysiiyay oo loogu talogalay wax kala iibsiga dowladda.
Waa horumar wanaagsan oo ku soo kordhay cilmibaarista dhaqaalaha Puntland. Way fiicnaan lahayd in cilmibaarayaashu ka jawaabaan su’aalaha siyaasadeed oo ay tusmadu abuurtay.
Source: http://mopicplgov.net/Puntland%20CPI-I%202015.pdf
http://puntlandpost.net/tusmo-sicireedka-adeegatada-puntland-consumer-price-index-tirooyin-iyo-siyaasado/
W.Q: Liibaan Axmad
libahm@icloud.com
About The Author
