Golaha Wasiiradda Somaliland oo taageero iyo Hambalyo u diray ciidamadooda ka dagaalamaya Laascaanood kuna goodiyey..
06 Apr 2023 (Puntlandes) Shirkii Golaha Wasiirrada Somaliland ee maanta ayey ugu horayn waxay taageero iyo Hambalyo u direen ciidamadooda ka dagaalamaya Laascaanood, sida ay u sugayaan amniga, una difaacayaan xaduudaha Somaliland.
Somaliland ayaa ku eedeysay Puntland in ay ka wado magaalada Laascaanood dagaal ay ku sameynayso xaduud qabyaaladeed, kaasoo ay sheegtay in uu saameyn ku yeelan doono xasiloonida iyo daganaanshaha Geeska Afrika.
Xukuumadda Somaliland ayaa sheegtay in ay garowsan tahay in ay heshiin doonaan iyada iyo shacabka gobalka Sool.
Somaliland ayaa ku hanjabtay in ay waajib tahay in laga sifeeyo magaalada Laascaanood waxay ugu yeereen Argagixiso iyo ciidamada Puntland ee soo duulay, si loo xaqiijiyo amniga xaduudaha Somaliland.
Hoos ka akhriso warsaxaafadeedka Somaliland:
Shirkii Golaha Wasiirrada Somaliland Oo Lagaga Hadlay Qodobbo Kala Duwan Oo La Xidhiidha Xaaladda Guud Ee Dalka.
Hargeysa-06-04-2023-()-Fadhigii 109aad ee Golaha Wasiirrada Somaliland oo uu shir-guddoominayey Madaxweyne Muuse Biixi Cabdi, kuna wehelinaayey Madaxweyne Ku-xigeenku Cabdiraxmaan Cabdilaahi Ismaaciil (Saylici) waxa lagaga hadlay qodobbo kala duwan.
Ugu horreyn, waxa war-bixin guud oo la xidhiidha amniga dalka laga dhegeystay Wasiirka Wasaaradda Arrimaha Gudaha, Mudane, Maxamed Kaahin Axmed, sidoo kale waxa goluhu war-bixin ku saabsan Dhaqaalaha Dalka laga dhageystay Wasiirka Wasaaradaha Horumarinta Maaliyadda, Dr Sacad Cali Shire.
Intaa ka dib, goluhu waxa uu dood iyo falan qayn dheer ka dib soo saaray qodobbo muhiima oo salka ku haya arrinta Laascaanood, kuwaas oo kala ah:
1. Wuxuu goluhu hambalyo iyo taageero u muujiyey ciidammada qalabka sida ee heeganka iyo difaaca hadh iyo habeenba ugu jira dalkooda iyo dadkooda sidii ay u difaaci lahaayeen, una sugi lahaayeen amniga guud ee dalka.
2. Goluhu waxa uu caddaynayaa in dagaalka Puntland ka waddo Magaalada laascaanood uu yahay mid ay ku doonayso in ay ku samayso xuduud qabyaaladeed, kaas oo saamayn ku yeelan kara xasilloonida iyo degenaanshiiyaha Geeska Afrika.
3. Goluhu waxa uu garawsan yahay in ay Xukuumadda Somaliland iyo shacabkeeda Laascaanood ay heshiin doonaan, mar walba oo dagaal dhacana waa laga heshiiyaa, balse Goluhu waxa uu dul istaagay muhiimadda ay leedahay in Laascaanood laga sifeeyo Ciidammada Puntland iyo Kooxaha Argagixisada ah ee ciidamada dagaalka kula jira, si loo sugo Xuduudaha Dalka.
4. Goluhu waxa uu iftiimiyey in ay Somaliland mar kastaba diyaar u tahay in arrinta Laascaanood lagu soo dabbaalo nabadgelyo, xabbad-joojin iyo wada-hadal, intaan khasaaruhu intaa ka sii ballaadhan.
Ugu danbayn, golaha waxa loo qaybiyey si ay u soo akhriyaan, isla markaana shirarka danbe looga doodo labadan xeer ee kala ah;-
1. Qabyo-qoraalka xeerka Komishanka Doorashooyinka Qaranka.
2. Kaabista iyo wax-ka beddelka xeerka gaadiidka iyo waddo-marista (Xeer Lr.56/2023.
ALLAA MAHAD LEH
Naasir Yuusuf Daahir
Agaasimaha Saxaafadda iyo Warbaahinta Madaxtooyada JSL.
About The Author
