Sawiro: Madaxweyne Kuxigeenka PL oo furay Todobaadka Dhaqanka iyo Hal abuurka ee Jaamacadda PSU

4 Dec 2015 (Puntlandes) Madaxweyne kuxigeenka dowladda Puntland Eng Cabdixakiin Cabdullaahi Cumar Camey ayaa xarunta Jaamacadda Puntland State University (PSU) ee magaalada Garoowe ka daahfuray Todobaadka Dhaqanka iyo Hal abuurka ee Jaamacadda qaybtiisa dhaqanka iyo Academiyadda.

Munaasabadda furitaanka oo kadhacday jaamacadda ayaa waxaa bandhigyo cajiib ah kasameeyey saddex kooxood oo looqaybiyey qaybaha ay u kala baxaan kulliyadaha Jaamacaddu oo kala ahaa Kooxda Damal, Kooxda Hiddo iyo Kooxda Ramaas.

Ugu horayn saddexda kooxood ayaa munaasabadda kusoo bandhigay qaybaha kala duwan ee xoolaha oo ka koobnaa Awr raran, Fardo, Lo’ iyo sidoo kale qaybaha kala duwan ee ariga oo isugu jirey riyo, ido iyo maqashooda oo lagu xereeyey meelo kudhow aqal Soomaaliyo jaamacadda kadhisan.

Intaas Kadib kuxigeenka madaxweynaha dowladda Puntland, mas’uuliyiin dowladda katirsan iyo maamulka Jaamacadda ayaa booqday goobaha bandhig dhaqameedku kasocdey oo lagu sharxay waxkasta oo lagu yaqaaney dhaqanka Soomaaliyeed,

Madaxweyne kuxigeenka dowladda Puntland Eng Camey oo khudbad kajeediyey munaasabadda ayaa ammaanay ardayda jaamacadda iyo sida ay uga go’antahay koruqaadista dhaqanka Soomaaliyeed, wuxuuna ku booriyey inaysan ka daalin dedaalkoodana labo jibaaraan.

Intaas kadib waxaa laguda galay munaasabad socotey mudo saacado ah oo lagu soobandhigay riwaado iyo suugaan, waxaa sidoo kale lasoo bandhigay dhaqamada dadka reer guuraaga ah ee Soomaaliyeed, beeraleeyda iyo kalluumaysatada intaba.

Munaasabadda ayaa waxaa xiritaankeeda maalinimada Axadda abaalmarino lagu gudoonsiin doonaa kooxaha kaalimaha hore gala iyo sidoo kale shaqsiyaad ku tartamayey qaybo kala duwan oo jaamacaddu mudo todobaad ah soowadey.