Sawiro: Madaxweynaha Dawladda Puntland oo sheegay inaanay aqbalayn go’aan ay gaadhey dawladda federaalka soomaaliya
Madaxweynaha Dawladda Puntland Dr.Cabdiweli Maxamed Cali Gaas ayaa caawa 27-Jan-2016 shir jaraa’id ku qabtay xarunta Madaxtooyada Soomaaliya kadib markii uu galabta Xarunta Villa Soomaaliya kaga qayb galay shir gaar ah oo ay kasoo qayb galeen Ra’iisul-wasaaraha Dawladda Federaalka, Madaxda Maamulada iyo wakiillo meteleyey Besha Caalamka.
Madaxweynaha Dawladda Puntland Dr.Cabdiweli Maxamed Cali Gaas ayaa intaasi kadib shirkii jaraa’id ee uu ku qabtay madaxtooyada kaga hadlay go’aankii ay dawladda federaalku gaadhey kaas ahaa in aqalka hoose ee baarlamaanka lagu soo xulidoono habka awood qaybsiga qabiilka ee 4.5, halka aqalka sarena lagu soo xuli doono hab maamul goboleed iyadoo Puntland iyo Somaliland loogu dari doono min saddex xubnood oo dheeraad ah, go’aankaas oo beesha caalamkuna ay soo dhoweysey.
Madaxweynaha Dawladda Puntland Dr.Cabdiweli Maxamed Cali Gaas ayaa shirkiisa jaraa’id ku sheegay in go’aanka ay gaadhey Dawladda Federaalka ee ku saabsan geeddi socodka Doorashooyinka 2016-ka aanu ahayn mid ay gebi ahaanba Puntland aqbalayso.
“waxaan rabaa halkaan inaan ka caddeeyo anigoo ku hadlaya magaca dawladda Puntland in aanan aqbalayn go’aankaas, ka-madaxweyne ahaana aanu ahayn go’aankaasi mid ay ii soo wakiisheen shacabka Puntland, aniguna rabitaankooda ayaan ku shaqaynayaa” ayuu yiri madaxweyne Dr.Cabdiweli Gaas.
Madaxweynaha Dawladda Puntland ayaa sidoo kale xusay shacabka soomaaliyeed in ay yihiin dad isku dan ah islamarkaana isku baahi ah oo doonay inay gaadhaan horumar iyo caddaalad balse waxa mustaqbalkooda hortaagni uu yahay nidaamka qabiilka ee 4.5 kaas oo aafeeyey horumarkii iyo helitaanka dawladnimadii soomaaliyeed.
Madaxweynaha Dawladda Puntland Dr.Cabdiweli Maxamed Cali Gaas ayaa geba-gebadii tilmaamay in uu talada ku celin doono shacabka reer Puntland maadaama ay iyagu yihiin cidda iskale go’aanka kama dambaysta ah.
“Anigu ka madaxweyne ahaan shacaka Puntland ayaan kucelinayaa talada iyaga ayaana go’aanka masiirkooda iska leh” ayuu yiri Madaxweyne Dr.Cabdiwli Maxamed Cali.
Puntlandes.com
About The Author
