sawirro: Guddoonka Baarlamaanka Puntland oo soo dhaweyn u sameeyey wafuuda Baarlamaanada Garowe ku sugan

27 Jan 2019 (Puntlandes) Guddoomiyaha golaha wakiilada Baarlamaanka Puntland ayaa munaasibad soo dhoweyn ah ugu sameeyay wafuudii golayaasha Baarlamaanada  heer Fedraal iyo heer dowlad goboleed ee kasoo qayb gashay Xafladda caleemasaarka madaxweynaha cusub ee dawladda Puntland Dr Saciid Cabdulaahi Deni.

Waxaa kulanka so odhaweynta diiradda lagu saaray arrimo ay kamidka yihiin muhiimadda ay leedahay wadashaqeyn dhex martay Baarlamaanada Heer Federaal iyo heer dowlada goboleed,si loo horumariyo danaha umadda Soomaaliyeed.

Ugu horeyn waxaa munaasibada ka hadlay guddoomiyaha golaha wakiilada baarlamaanka dowlad goboleedka Puntland C,xakiin Maxamed Axmed waxaana uu sheegay in uu soo dhawaynayo hay,adaha wafuuda baarlamaanada ka kala socotay Dowladda Soomaaliya iyo dowlad Goboleedyada.

Xareed Cali Xareed guddoomiye ku xigeenka baarlamaanka Galmudug iyo guddoomiyaha baarlamaanka Dowlad goboleedka Hir.shabeele Sheekh Cusmaan Barre ayaa madaxda baarlamaanka Puntland iyo shacabka uga mahadceliyay soo dhoweyntii ay reer Puntland u sameeyeen wufuudii Garoowe soo gaartay.

Mudane Mahad Cabdalla Cawad guddoomiye ku xigeenka 2aad Golaha Shacabka BFS ayaa sheegay in Garoowe ay Tahay meel nabad ah dalxiisyadii loo tagi jiray Nairobi iyo Yuganda lagu badalo.

Munaasibada waxaa soo xeray Guddoomiyaha Golaha Aqalka sare BFS Cabdi Xaashi Cabdullaahi waxa uu Sheegay in munaasibadan ay tahay mid loo baahnaa uuna u mahadcelinayo madaxda baarlamaanka Puntland .