Qaraxii Suuqa Muqdisho Mall ee Xamar weyne & Khasaaraha ka dhashay
04 Feb 2019 (Puntlandes) Faah faahin ayaa ka soo baxaya gaari waxyaabaha qarxa laga soo buuxiyay oo ku qarxay agagaarka Suuqa Ganacsiga ee Muqdisho Mall ee degmada Xamar Weyne.
Qaraxa ayaa ka dhacay Wadada hor marta Muqdisho Mall iyo Baar Italia ee degmada Xamar weyne, gaar ahaan halkii la oran jiray Kuleejo del Sud oo ku dhow xarunta dowladda Hoose ee Gobolka Banaadir.
Ugu yaraan 10 ruux ayaa ku dhintay qaraxa, halka tiro kalena ay ku dhaawacmeen, waxaana goobta la qarxiyay ay aheyd mid mashquul badan oo dadbadan fariistaan.
Dhismaha Muqdisho Mall ayaa waxaa ku yaalla ganacsiyo kala duwan sida maqaayado, goobo dharka lagu iibiyo dukaamo kale.
Burbur xooggan ayaa soo gaaray dhismaha Muqdisho Mall iyo goobaha ka ag dhow, sidoo kale gawaari goobta yaalay ayaa burbur soo gaaray, sawirro laga soo qaaday goobta waxay muujinayeen khasaaraha uu geystay qaraxa.
Dad badan ayaa is weydiinaya sababta gaariga qarxay goobta loo dhigay, kana soo gudbay labada Koontarool ee Ciidamada amniga ka ilaaliyaan agagaarka xarunta dowladda Hoose iyo dhismaha Muqdisho Mall.
Puntlandes.com
About The Author
