Sawirro: Shacabka Garowe oo si kadis ah Khayre ugu arkay isagoo Dhex lugaynaya barxada Magaalada Garowe

05 May 2019 (Puntlandes) Ra’isul wasaaraha Soomaaliya Xasan Cali Khayre oo labadii maalmood ee u dambeeyay ku sugnaa magaalada Garowe, halkaasi oo uu uga qaybalayo shirka wadatashiga madaxda federaalka iyo dowlad xubnineedyada ayaa saaka si kedis ah loogu arkay barxada magaaladda.

Ra’isul wasaaraha oo weheliyeen ciidamo ilaalo oo kooban ayaa lugeeyay wadooyinka Garowe, isagoo shacabka shaah iyo sheeko kula wadaagay qaar ka mid ah meheradaha lagu shaaheeyo ee ku yaal barxada Garowe iyo xaruntii hore ee madaxtooyada Puntland. Waxaa kaloo uu booqday qaar ka mid ah carwooyinka iyo goobaha ganacsiga ee Garowe.

Wuxuu dhagaystay cabashooyinka iyo talooyin ay u soo jeediyeen odoyaashii, dhalinyaradii iyo haweenkii uu kula kulmay goobaha uu booqaday. Waxaa uga mahadceliyay sida diiran ee shacabku ay markasta u soo dhaweeyaan, isagoo u duceeyay shacabka iyo magaaladda Garoowe.

Booqashada Khayre ee Magaaladda Garowe ayaa imaanaysaa iyadoo dhammaan madaxdii federaalka iyo Dowladaha xubnaha ka ah uu maanta shir gogol xaar ah uu uga furmay xarunta madaxtooyada ee Garoowe.